Ken ta Cecil?
Ami ta Cecil Kleine, mi a nanse na Merka pero despues di un pari luna na Florida i despues Hulanda, mi mayornan a disidí bai Kòrsou bèk pa lanta ami i mi ruman muhenan kaminda nan mes a krese. Mi mayornan ta opera un kompania spesialisá den tuinaanleg na Kòrsou. Nan ta Ben Kleine i Vivian Dolorita. Foi chiki mi tabatin interes pa deporte i arte. Mi a partisipa den deporte mane tènes, futbòl, paintball i jiu jitsu. Band’i deporte mi gusta pinta, skibi, lesa, biaha, kushina, fotografia, i pelikula.

Despues di a haña mi diploma na MIL, mi a move bai Hulanda ku 19 aña. Sin tin idea di kiko mi kera hasi ku mi futuro, mi a eksperimenta ku estudionan, kambiando di Cultuurwetenschappen, purba Bedrijfskunde te ku mi a haña ku mi kera hasi Economie i spesialisa den Marketing. Mi ke hasi algu ku ta dunami e espasio pa hasi algu kreativo i ku tin un ambiente di kompetensia.

Ki ba hasi anto?
Di tur e deportenan ku mi a purba na Kòrsou, esun ku a bira mi pashon tabata paintball. Na Kòrsou no ta tin masha hende ta partisipa den e deporte, anto despues ku e hungadonan ku mas eksperensia a bai Hulanda pa bai studia, e deporte a kuminsa muri na Kòrsou. A pesar di esaki, ami i un grupo di hungadonan fiel a keda traha duru pa por sigi ku e deporte. Esaki a sigi asina te ku e dia a bin ku mi mes mester a bai Hulanda.

Einan mi a sera konosí ku e ekipo Amsterdam Xistence, e team ku mas eksito na Hulanda. Mi a haña mi chèns pa hasi un try out na un kompetensha na Bèlgika i e team a disidi di lagami drenta. Mi tabata e prome hungando den e ekipo ku no a nanse na Hulanda. Awoki mi ta den mi di tres aña ku Amsterdam Xistence, ku awoki ta konsisti di 12 hungando di kua 5 ta yu’i Korsou.

Durante e tempu aki e team a wordu promové na e liga Semi Professional di Europa , gana e kampianato di Hulanda tumando e prome i di dos luga ku dos squad i hunga na evenementonan na diferente pais mane Spaña, Fransia, Inglatera, Alemania, Bègika i Turkia. Mi a sera amistad ku hungadonan di rònt mundu i mi a haña un bista den nan kultura i a mustra nan un tiki di nos.

Si un hende lo a bisami 3 aña pasa ku mi lo hasi tur e kos nan aki, lo mi a hari nan. Paintball a duna ami e oportinidat pa por biaha, haña amigu rònt mundu i hunga e deporte ku mi stima. E eksperiensia ta algu ku a siñami hopi. Pero e kosnan mas importante ta pa semper sigi bo kurason i lo bo haña sa ku bo por logra mas ku bo ta kere i por imagina.

Ki tin pa mañan?
Loke mi ke hasi den mi futuro, ta kaba mi estudio na prome luga i kuminsa mi carriere den e mundu di marketing, preferibel un posishon ku ta lagami biaha i mira mas di mundu. Mi ta kere ku semper lo mi keda aktivo den e mundu di paintball, hungando te dia mi kurpa no por mas i hasi mi pida pa yuda e deporte krese. Kòrsou a krea hopi hungado ku talento ku a drenta e nivelnan di mas haltu den paintball na Hulanda. Hungadonan ku a bin for di un isla chikitu ku tiki fasilidat di paintball. Ami lo ke mira mas yu’i Korsou tuma loke nan stima i hasie nan kontribushon, sea ta talento den deporte, estudio, arte of mundu di empresa.

website: www.teamxistence.nl

Ken ta Rayni?
Ami ta Rayni Rijke, Yu di e dushi isla Kòrsou, nansé den e bunita aña di 1985.

Ki ba hasi anto?
Na Kòrsou mi a bai Maria Immaculata Lyceum kaminda mi a hasi HAVO. Despues mi a bin Hulanda pa studia. Promé mi a hasi Technische Natuurkunde, pero despues mi a kambia bai pa Commercieel Ingenieur.
Banda di esei pa basta tempu kaba mi tabata kana ku e idea pa tin un negoshi dimi mes. Semper mi tabata gusta e idea pa tin un empresa di mi mes ja mi por dal bai ku mi mes ideanan. Na 2008 mi a kuminsá ofisialmente ku XR Media. XR Media ta enfoká mas tantu riba trahamentu di websites, pero tambe riba algun proyektonan di nos mes. Un di esnan aki ta TeraFriu.com kua ta un idea di ami ku mi ruman.

Ki tin pa mañan?
Pa ami mes mi ta mira ku mañan mi empresa mester a krese i bira mas grandi. Mi mester por a hasi algu ku tur e ideanan ku mi tin den mi mente i mi mester por biba trankil.
Pa Kòrsou mi ke mira nos ta yuda nos mes bai dilanti. I tambe exporta e “produkto Kòrsou”  den eksterior. No per sé komo algu turistiko pero komo know-how ku nos yunan di tera ta kria rond mundu pero ku nos no por huza na nos dushi Kòrsou. Poniendo ku hopi no ta bai bèk pa yuda e isla.

website: www.xrmedia.net

Ken ta Elroy Peters?
Mi ta un hoben yu di Kòrsou nase dia 26 december 1986. Mi ta bin for di un famia di 6 ruman. 4 muhé i dos homber. Ami i mi ruman ohochi. Mi mayornan semper a siñami pa mi lucha pa loke mi ke, pero sòru pa semper mi yega na loke mi ke yega den un manera korekto. Ne momentunan aki mi ta bibando na hulanda (Eindhoven). Mi ta haña akinan hopi bon paso e ta rustig meskos ku mi. Mi no gusta bochincha ni bònbòshí mashá. Pero mi sa si kon pa hasi wega i pasa pret ora mi ta huntu ku mi amistadesnan.  Mi ta den mi lastu aña di skol awoki na HBO i mi ta siñando pa bira un software engineer (computer geek) :P.

Ki ba hasi anto?
Wèl mi a yega di hasi hopi kos den mi bida. Pero kosnan ku mi ta orguyoso di dje ta mi partisipashon i triunfo den Arte di Palabra di aña 2003. Mi ta hopi orguyoso di esei.  Aktualmente bo por haña e poesia pa lesa den e buki di kompilashon di poesia i kuenta ku arte di palabra a saka. Banda di poesia, mi ta bezig ku opvang week di Eindhoven aktualmente, kaminda nos ta yuda e studiantenan ku a kaba di yega hulanda regla tur nan kosnan na hulanda. Na e momentunan aki mi a lanta un negoshi di drecha lèptòp i kompiüter i esei tambe ta bayendo bon. Den poko palabra bisá. Mi ta hasiendo hopi.

Ki tin pa mañan?
Wèl mañan no ta di nos, pero tòg mi ta spera ku tur kos bai bon e aña aki ya asina mi por logra haña mi diploma. Tambe mi ta spera mi negoshí bira mas grandi ya asina mi por sigui hasi e lokual mi gusta. Banda di esei mi tin pensá di bai traha na un kompaniá na hulanda ya asina mi por kue mas eksperensia den mi rango. Mi ta spera ku Kòrsou por avansá un poko mas den futuro ya asina mi por bai bèk mi dushi isla sabiendo ku mi por tin un trabou of ku mi por lantá mi negoshí sin wordú wantá atras. Tambe mi ta spera ku Kòrsou por sigui engrandesé i ku su yunan tambe sigui hasi kosnan positivo pa saka kara di nan isla.

website: www.komtek.nl